Training ass normalerweis Méindes a Mëttwochs owes. Fir déi genau Datumer an Auerzäiten kuck wgl am Menupunkt Agenda.

PMT ass d'Oofkierzung fir Palmes, Masque, Tuba, also: Flossen, Taucherbrëll a Schnorchel.
Training PMT heescht also näicht aaneschters wéi Training mat de Flossen, Taucherbrëll a Schnorchel (ouni Fläschen).

Fir een Training PMT brauchs du deng normal Schwammsaachen (Schwammbox/Maillot, Duch, Shampoo,...), Piscineflossen, een Taucherbrëll an ee Schnorchel. Mir hunn an der Piscine eng Reih vun Taucherbrëllen, Schnorchelen a Flossen fir auszeléinen. Wanns du dat Material nach net hues, kanns du awer op engem Training PMT deelhuelen.

"Training Bouteilles" ass Fläschentraining an der Piscine. Hai ginn déi Basisexercicer an Techniken mat den Fläschen trainéiert. Fläschentraining ass normalerweis 1-2 mol de Mount. Fir déi genau Datumer an Auerzäiten, kuck wgl am Menüpunkt Agenda.

Fir un engem Fläschentraining deelzehuelen brauchs du d'Material PMT an eng Tauchfläsch, een Détendeur an eng Veste. All dat Material kanns du vum Club geléint kréien. (Wanns du Material geléint brauchs, kuck wgl och ënnert dem Punkt "Wéi kann ech Material vum Club léinen".
Deene Leit, deenen et séier kaal gët, kënnen zousätzlech een dënnen Neoprenscostume undoen (kritt een net vum Club geléint).

Training Fosse ass Training an engem 15 Meter déiwen Baséng an der Piscine Olympique um Kierchbierg. Training Fosse ass ongeféier 3-4 mol am Joer, donnesdesowes. Fir déi genau Datumer kuck wgl ënnert dem Menupunkt Agenda.
RV fir den Training Fosse ass zu deenen genannten Datumer um 19:30 virun der Keess vun der Piscine olmpique.

Fir een Training Fosse brauchs du dat selwegt Material wéi op engem Fläschentraining (Training Bouteilles) + eng Schwammkaap.
Well d'Waasser hai bësse méi kaal ass wéi an der Dikkrecher Piscine, ass et net schlecht een Neoprenscostume ze hunn (et geet awer och ouni).
Konditioun fir an d'Fosse matzegoen ass Member vum Club ze sinn an eng gülteg Lizenz ze hunn.

Taucherbrëll, Piscineflossen an Schnorchel kann een an der Piscine léinen (dat brauch een net am viraus ze reservéieren). Dat Material ass awer ausschliesslech fir d'Piscine geduecht a kann net aus der Piscine matgeholl ginn.

Tauchfläsch, Détendeur a Veste MUSSEN AM VIRAUS RESERVEIERT AN OOFGEHOLL ginn.
Fir dat Material ze léinen, MINDESTENS 3 Deeg am Viraus bei engem Responsable Matériel uruffen. (Telefonsnummeren an Nimm fannt dir ënnert dem Menupunkt Club - Comité.
Dën Responsabel Matériel mécht ee RV mat iech aus, wéini dir d'Material kënnt oofhuelen an kann och mat iech zesummen kucken, op d'Fläschen nach musse gefëllt ginn.

Fir dat geléinte Material froë mir ee Forfait vun 5 Euro pro Fläschentraining oder Tauchgang (egal obs du un dëser Aktivitéit deelhuelt oder net). Wanns du also nach Clubsmaterial doheem hues an op der nächster Clubsaktivitéit, wou dat Material gebraucht gët, net kanns deelhuelen, da setz dech wgl mat engem Responsabel Matériel a Verbindung, am anere Fall kriss du dat Material verrechent.

Wanns du eppes vun deem Material futtiméchs (wat keng normal Oofnotzerscheinungen sinn), muss du fir d'Reperatur bezuelen. Setz dech an deem Fall sou séier wéi méiglech mat engem Responsable Matériel a Verbindung.

PMT kriss du gratis geléint (dat Material ass awer just fir an der Piscine geduecht an du däerfs dat och net mat heemhuelen.)

Ufänger kréien d'Material gratis geléint (bis sie deen éichten Brevet gemaach hunn, awer maximal während deenen éichten 18 Méint, wou sie am Club sinn).

Gratis ass och d'léinen vum Material fir déi Lait, déi amgaange sinn, ee Brevet am Club ze maachen.

Rechnungen fir d'Material ginn all puer Méint eng Kéier geschéckt.

D'Ausrüstung ass zimlech deier,  mee wann een bis eemol alles ugeschaf huet, ass Tauchen keen deiere  Sport méi. (Jiddefalls mol hai am Land, wann een d'Vakanzen  mattrechent, ass dat natierlech eng aaner Saach :-) )

Flossen, Taucherbrëll a Schnorchel kriss du an der Piscine gratis geléint, wanns du awer op enger  Formatioun um Stau wëlls deelhuelen, muss du déi selwer hunn.
Fläsch, Veste an Détendeur kritt ee gratis geléint bis een ee Brevet  huet (maximal awer während 18 Méint). 
Wann een also just wëllt um Piscinentraining an un de  Fläschentraininger an der Piscine deelhuelen muss ee just an ee  Maillot investéieren (an d'Cotisatioun vum Club 60 Euro Cotisatioun  + 40 Euro Droit d'Entrée). 

Fir mat op de Stau tauchen ze goen, muss du virdrunn eng Formatioun  matmaachen fir ee Brevet ze kréien. Hai fängt dat ganzt dann un ee  bësse méi materialopwendeg an deier ze ginn. 
Dofir misst du ongeféier rechnen: 
Cotisatioun an Droit d'Entrée     (100 Euro, muss du och bezuelen,  wanns du einfach nemmen an de Club wëlls kommen) 
Formatioun Brevet    150 Euro 
Masque                        ab 40 Euro 
Tuba                             ab 15 Euro 
Palmes chaussantes            ab 70 Euro 
Bottillons                      ab 40 Euro 
Gants                            ab 30 Euro 
Costume 7mm ab 300 Euro (mir hunn ee puer Costumer fir auszeléinen,  wann ee passt kritt een e gäeren geléint, wann déi net passen, muss  ee selwer ee kafen) 
Bläi mat Rimm             ab 100 Euro 
Détendeur                    (ab 350 Euro, kritt een awer  och vum Club geléint, gratis bis een e Brevet huet awer maximum 18  Méint) 
Fläsch                           (ab 220 Euro, kritt een  awer och vum Club geléint, gratis bis een e Brevet huet awer maximum  18 Méint) 
Veste                             (ab 300 Euro, kritt een  awer och vum Club geléint, gratis bis een e Brevet huet awer maximum  18 Méint) 

Nom Brevet froen mir dann eng Locatioun vun 5 Euro fir de Set  Fläsch, Veste an Détendeur. 

Déi Lait déi Spaass um Tauchen hunn an och regelméisseg op den Stau  tauche ginn kafen sech normalerweis méi spéit dann och nach ee  Computer, eng Luut, ee Kompass,... 
Hai sinn d'Präisser ganz variabel mee zu deem Zäitpunkt weess een  normalerweis och wat ee wëllt a säin Hobby investéieren.

Nee, an denger Cotisatioun sinn alleguerten d'Entréen fir an d'Piscine wàhrend deenen ofiziellen Clubstraininger abegraff. Du geess do och net zur Haaptentrée erann, mee op der Sàit vun der Piscine (op der Sàit vum aalen Fussballsterrain).

D'Tauchfläschen kann een op verschiddenen Plaatzen fëllen.

Fir den Piscinentraining ass et am praktesten, dës am Pompjeesbau zu Dikkrech fëllen ze lossen. Haifir wgl ee RV mat engem Responsable Matériel ausmaachen. D'Fëllen am Pompjeesbau zu Dikkrech as gratis.

Alternativ kanns du d'Fläschen och zu Lultzhausen fëllen. (Praktesch fir d'Tauchgäng um Stau). Eng automatesch Fëllanlag fënns du ënnen bei der Base nautique (dës fonktionnéiert mat 2 Euro Stécker) oder op der Säit vun der Jugendherberg (dës fonktionnéiert just mat 50 Cent Stécker).
Wanns du ee bësse méi Zäit hues, kanns du och op Insenborn bei de Jacques (Hotel Peiffer) goen. Dat ass ee Café/Restaurant/Hotel mat Fëllanlag.

Fir op engem Training mattzemaachen, muss du Member am Club sinn (natierlech kanns du een oder zweemol op een Training "probéieren" kommen, éierst du dech am Club aschreifs (wann et dir gefällt, solls du dech awer sou séier wéi méiglech aschreiwen).
Weider Konditioun ass eng gülteg Lizenz ze hunn (sou séier wéi méiglech ee gültegen Certificat médical (modèle Flassa) an d'Sekretariat vum Club schécken)

An der Piscine kënnen ouni Problem och Ufänger deelhuelen (Mindestalter 12 Joer).
Fir op de Stau ass d'Viraussetzung awer ee Brevet ze hunn, mindestens P1 / CMAS* oder equivalentes (KEEN Bubblemaker oder Open Water JUNIOR Diver).

Am Club kanns du sou laang üben an trainéieren, bis du alles kanns. D'Ausbildung gët zu engem Präiss ugebueden, deen just d'Fraisen deckt. Zousätzlech Tauchgäng an Piscinentraininger kaschten näicht. D'Ausbildung ass dofir méi ausféierlech wéi an deenen meeschten Tauchbasen.

Aneren Virdeel: Wanns du haiheem am Stau däi Brevet méchs, kanns du an der Vakanz direkt vum éichten Dag un ufänken mat richteg Tauchen, ouni virdrunn mussen fir ee Brevet ze trainéieren.

Am Club kanns du de P1 (CMAS*), de P2 (CMAS**), de P3 (CMAS***), de Nitrox1 an den Nitrox 2 maachen.

Déi verschidde Coursen ginn regelméisseg ausgeschriwwen. (Normalerweis am Rhythmus vun 1 x am Joer.)

CMAS ass d'Oofkierzung fir Confédération Mondiale des Activités Subaquatiques an ass den Daachverband vun deenen meeschten Tauchfederatiounen. Alleguerten d'Breveten, déi vum Club ausgestallt ginn hun eng Säit CMAS a sinn dofir weltwäit unerkannt.

P1: 150 Euro

P2: 100 Euro

P3: 100 Euro

Nitrox: 100 Euro

Net am Präiss abegraff sinn d'Cotisatioun vum Club, eventuell Droit d'Entrée an d'Material wats du selwer muss hunn: Flossen, Taucherbrëll,...

Just nach d'Cotisatioun vum Club, déis du all Joer muss iwwerweisen wanns du wëlls Member am Club bleiwen.
Wanns du dir nach zousàtzlech Material wéi een Tauchcomputer, eng Luut,... wëlls kafen, ass et natierlech nach méi deier. mee hai ka jiddereen selwer entscheeden, wéivill een nach wëllt ausginn.

De Brevet huet keen Verfallsdatum. Wanns du awer laang net méi tauchen wäers, recommandéiere mir dir ee puer Sécherheetsexercicer mat engem Moniteur ze trainéieren.

Wanns du ee Brevet bai ais am Club oder bei der FLASSA (letzebuerger Taucherfederatioun) gemaach hues, dann iwwerweis wgl 10 Euro op den Clubskonto a maach eng kuerz Mail un d'Clubsadress mat deenen néidegen Informatiounen (Numm, wéi ee Brevet,...). Mir këmmeren ais dann drëm, dass du eng nai Käertchen kriss.

Hues du däin Brevet am Ausland oder net bei der letzebuerger Federatioun gemaach, muss du dech un déi jeweileg Base, Club,... wenden. Do kënne mir dir leider net hëllefen.

Schreif eng Mail un d'Clubsadress mat deenen néidegen Informatiounen an dengen Präisvirstellungen. Ideal ass et, wanns du och Fotoen vun dengem Material hues.

Wanns du eppes verkaaft hues, dann schreif wgl och eng Mail, sou datt mir déi Saachen vum Site kënnen rofhuelen.

Eng komplett Basisausrüstung kriss du ab 1500 Euro. (Geräteflossen, Händchen, Masque, Schnorchel, Costume, Botillons, Bläi, Fläsch, Veste, Détendeur).

Fläsch, Veste an Détendeur kanns du awer gratis vum Club geléint kréien, währends du den Brevet méchs. Duerno verrechnen mir dir dat Material zu engem Forfait vun 5 Euro pro Clubsaktivitéit.

Jo, fir um Training deelzehuelen oder ee Brevet ze maachen, muss du eng gülteg Lizenz hunn.

Dofir hues du zwou Méiglechkeeten:

1. Huel ee Rendez-vous am INS fir dech do vun engem Sportsdokter ënnersichen ze lossen. Dës !ennersichung ass gratis. Wann alles an der Reih ass, kriss du duerno deng Lizenz heemgeschéckt.

2. Lued den Formulaire vum Certificat médical (modèle Flassa) eroof (Menupunkt Downloads).
Loss deen Certificat vun engem Dokter denger Wahl ausfëllen a schéck eng Kopie dovunner un d'Sekretariat vum Club. Duerno kriss du deng Lizenz heemgeschéckt.

D'Flassa recommondéiert d'Méiglechkeet 1, also sech vum Dokter um INS ënnersichen ze lossen.